全屋要幾多個電制面板先夠？

我首先畀個好大概嘅數字你，平均每100尺需要10個電制。以400尺單位計，依家好多人都會需要到40個電制位。

可能你會覺得，「嘩，使唔使咁多呀！我以前住300幾尺公屋得10幾個電制位咋喎，依家大咗少少，使唔使成40個電制呀？」。

第一：以前冇咁多電器，依家電腦、音響、Router變咗每間屋嘅標配，樣樣都要插電。

第二：難得畀咗咁大舊錢買樓，裝修緊係想成間屋企企理理，電制預多好過預少，到時唔夠用要拖板駁上駁就會破壞成間屋嘅設計。

第三：拖板線Kick腳，亂買拖板、萬能蘇容易成為安全問題。

就等我同大家數下400尺兩房單位嘅40個電制位點得嚟啦。

（除咗孖蘇係計兩個位之外，其餘電制都係計一個位）

廳：8-12個電制

廳一般起碼需要用到燈、冷氣、電視、風扇、天線，連埋依家幾乎每戶都會裝嘅寬頻、Router，都至少要6個電制位。為吸塵、抽濕、打爐爐等等而準備嘅備用電制，再配備一個多啲位數嘅排蘇以應付打機、音響或其他需要，12個電制位都係非常正路。

廁所感覺上要電嘅位置唔多，燈同抽氣扇必備，一個蘇位插風筒，至少要3個電制位。不過屋企唔係用煤氣爐而係電熱水爐嘅話，通常就會多一個電制位用嚟做有燈曲架開關。浴室寶依家越嚟越多人用都佔一個電制位。如果想High Class啲做埋電熱馬桶同電熱毛巾架，額外2個蘇位提供獨立電源就唔少得喇。

廚房嚟講係一個用電重地，燈、飯煲、湯煲、抽油煙機、洗衣機、雪櫃、微波爐、熱水壺已經幾乎係必備，數一數已經要用8個電制位，唔用煤氣爐用電磁爐嘅話又多一個，如果要加埋焗爐、攪拌器、洗碗機就隨時多過呢度10個添。

主人房嘅話有必備嘅燈、冷氣同風扇，基本3個電制位走唔甩，床頭燈視乎需要。剩低落嚟嘅就係電腦同電子用品嘅供電，通常都會用排蘇去應付，不過如果你興趣比較多，玩音響玩電子樂器等等，排蘇就要買長啲先得嚕。

客房畀囝囡用，配置原則上同主人房分別唔大。

加加埋埋，400尺兩房單位40個電制位真係差唔多嚕，所以平均每100尺就需要10個電制，再計返你單位嘅大細，就可以推斷出你屋企需要嘅電制位數量。呢個資料有助你估算自己單位嘅裝修預算，希望幫到大家。

統計好之後，嚟我哋網店揀下想要咩款式啦！