如果你買咗二手樓，好多時候都會諗裝修，因為上手唔少嘢都變殘變舊。
燈呀牆呀傢俬嗰啲好明顯你知道使唔使換，或者係講想唔想換，想點樣換。
然後你好多時候會忽視咗「電箱」呢個部份，一個影響你居家安全命脈嘅地方。
你可能覺得上手電箱仲用得，睇落新淨可能唔使換都得，慳返筆。
有可能啱嘅，但係喺真正做決定之前，建議考慮以下因素。
現況：
外表有冇明顯殘缺、甩漏、受潮生鏽等等比較明顯睇到嘅問題，如果外表明顯有問題就唔使諗啦，換得！
安全標準：
舊電箱可能唔符合當前嘅安全標準，包括一啲絕緣要求、物理強度要求，換有保證嘅新電箱可以避免呢個問題。
擴展性：
舊電箱專用嘅Fuse可能已經停產，依家香港主流係用Hager、Schneider、Legrand、CHINT等等嘅牌子，如果係上年代嘅產物，BBC、Federal、Clipsal、三菱等等嘅牌子，一旦其中一條故障而市面買唔返，又或者想加裝Fuse，可能要成個新箱換先得，到時先改裝可能好大工程，而且會影響美觀。
費用：
更換電箱可能需要幾千至幾萬蚊，視乎地區、電箱大細、單相定三相、品牌、安裝難度，建議你諮詢專業電工，拎多幾個報價，以便比較唔同嘅方案同價錢。
最後，我知道就算畀咗以上嘅資訊你，你都唔會即刻決定到使唔使換，因為安全標準好難得知，舊電箱嘅牌子停咗產未得行內人先知，但係可以畀你了解返我哋電力行業係點樣做判斷，到你要同裝修師傅交手嘅時候，揸返多啲資料喺手永遠冇壞嘅！
我哋代理多種知名品牌電箱，有需要嘅話，可以透過Whatsapp 55401982向我哋查詢。
Comments