「燈曲、曲架掣係咩嚟？20A燈曲？冷氣曲架掣？熱水爐燈曲？同燈掣有咩分別㗎？」
相信你收到電工師傅寫畀你嘅呢張嘢嘅時候，都會有個咁嘅疑問。
如果你驚自己買錯嘢，或者驚去到啲鋪頭畀人問返轉頭，而網上搵資料做定功課，咁以下落嚟呢篇文章就啱晒你喇。
就等我哋介紹返燈曲呢樣嘢，等你出到去啲水電鋪都知道自己買緊啲咩啦！
燈曲，正式嘅名稱係有燈雙極開關掣。
（因為英文叫做Cooker switch，所以就將Cooker直譯做曲架，加埋switch就係曲架掣，經省略後就變成燈曲，好有港式譯名嘅味道！）
所以你見到師傅講親，20A燈曲、曲架掣、冷氣曲架掣、冷氣開關，其實好多時候都係講緊同一隻嘢。
雙極開關可以同時控制火線同零線，當用喺冷氣機、電熱水爐、電磁爐等等負荷較大嘅電器時，使用上會更加安全。
而盞指示燈就可以畀你知道部電器係咪接通咗電源，燈著咗，啫係部電器有電到咁解。
市面上嘅燈曲，一般最少可以承受20A，如果負荷再大啲，某啲牌子會出埋32A、或45A嘅燈曲。
咁有雙極梗係有單極㗎啦，單極開關只控制火線，常用喺室內照明嘅燈具度，所以亦都簡稱叫做燈掣。
市面上嘅燈掣，一般最少可以承受10A，某啲牌子會係16A。
有啲款冇指示燈，有啲款有指示燈，畀你夜晚黑引路用，所以係熄燈嘅時候盞指示燈先會著。
因為少極都頂到10A，所以除咗燈之外、小型抽氣扇等等嘅細負荷電器都用得。
燈曲、曲架掣款式五花八門，想揀到自己中意嘅款式，記得嚟我哋網店睇下啦，折扣價發售㗎！
Comentarios