電制面板除咗常見嘅燈掣、插座之外，仲有一樣你未必成日聽到，或者佢一直存在，但係冇乜點注意到佢，不過當去到裝修後期，就唔到你唔認識喇！
因為幾乎每間屋都需要用到佢，嗰樣嘢就係「接線蘇」喇。
你應該會收到電工師傅寫嘅一張類似咁嘅嘢，然後叫你揸住去電工材料鋪買電制。
「不過接線蘇究竟係咩嚟㗎？有咩用途同功能？Fuse蘇又係咩嚟？」
如果你驚自己買錯嘢，或者驚去到啲鋪頭畀人問返轉頭，而網上搵資料做定功課，咁以下落嚟呢篇文章就啱晒你喇。
就等我哋介紹返接線蘇呢樣嘢，等你出到去啲水電鋪都知道自己買緊啲咩啦！
接線蘇，顧名思義就係用嚟接線，為固定電器裝置提供電源，冷氣機、熱水爐、抽氣扇等等嘅電器都有機會用到。
視乎所接電器嘅用電負荷，接線蘇可以再分為以下三種：
1）菲士(Fuse)接線蘇
所謂菲士就係Fuse嘅意思，多咗粒Fuse用嚟保護供電電路，最常見係13A。
受電例所規限(BS1363)，最高負荷都只係13A，所以市面上你唔會見到有任何一款超過13A嘅Fuse蘇出售，有啲師傅自行將入面粒Fuse換成更大A數，其實唔合電例要求嘅。
經常會應用喺抽氣扇、煤氣爐等等負荷較細嘅固定電器度。
視乎具體應用要求，Fuse蘇可以再細分為有冇指示燈同有冇開關掣：
a. 冇燈冇掣
b. 有燈冇掣（比較少見）
c. 冇燈有掣
d. 有燈有掣
2）肚臍接線蘇
超過13A嘅接線蘇，好多時候就係用呢啲肚臍蘇喇，所謂肚臍蘇就係無Fuse，而中間有個入線位嘅意思，常見係20A同25A。
經常用喺冷氣、電熱水爐、焗爐等等負荷較大嘅固定電器度。
受電例所規限，因為呢啲肚臍蘇冇Fuse保護，所以只適合用喺獨立供電嘅佈線線路入面。
而且，唔似Fuse蘇咁可以有開關，肚臍蘇係冇開關嘅，如果需要有開關功能，必須另外裝一個燈曲（關於燈曲係咩，可以睇呢篇文章）。
3）龜背接線蘇
龜背蘇其實係肚臍蘇嘅更大A數版，有舊嘢向外凸出，外型酷似龜背而命名。
常見係30A同45A，但因為負荷較大，所用電線較粗，一般唔會喺正面有出線位。
同肚臍蘇一樣，因為呢啲肚臍蘇冇Fuse保護，所以只適合用喺獨立供電嘅佈線線路入面。
而且，唔似Fuse蘇咁可以有開關，龜背蘇係冇開關嘅，如果需要有開關功能，必須另外裝一個燈曲（關於燈曲係咩，可以睇呢篇文章）。
接線蘇款式五花八門，想揀到自己中意嘅款式，記得嚟我哋網店睇下啦，折扣價發售㗎！
Opmerkingen